თ.ე.უ.ს.უ.-ს აჩრდილი…

იანვარი 22, 2011 by ninnaka 6 Comments

თბილისის ეკონომიკურ ურთიერთობათა სახელმწიფო უნივერსიტეტი (თეუსუ), როგორც უმაღლესი საგანმანათლებლო დაწესებულება დაარსდა 1992 წლის 19 მარტს. უნივერსიტეტის ძირითადი მიზანი იყო ბიზნესის და მართვის და სამართლის დარგების მაღალკვალიფიციური სპეციალისტების მომზადება, რომლებიც ხელს შეუწყობდნენ ქვეყნის სოციალურ, პოლიტიკურ, ეკონომიკურ განვითარებას, დემოკრატიული პრინციპების დამკვიდრებას, სამოქალაქო საზოგადოების ჩამოყალიბებას. ამ მიზნის მისაღწევად უნივერსიტეტი აქტიურად და მიზანმიმართულად ახორციელებდა რეფორმებს. უნივერსიტეტში დამკვიდრდა სამსაფეხურიანი სწავლება – ბაკალავრიატი, მაგისტრატურა, დოქტორანტურა. ყოველი საგანმანათლებლო პროგრამის, ყოველი დისციპლინის სრულფასოვანი გააზრებისა და ათვისებისათვის შემუშავდა კურიკულუმები, სილაბუსები. სასწავლო პროცესის შეფასების სისტემა სრულად პასუხობდა ევროპული კრედიტების სატრანსფერო სისტემის მოთხოვნებს.
თეუსუ-ში ფუნქციონირებდა “ბიზნესისა და მართვის”, “სამართლის” , “ჰუმანიტარულ და სოციალურ მეცნიერებათა “ ფაკულტეტები ,სადაც სწავლება მიმდინარეობდა ბაკალავრიატის საფეხურის ოთხი მიმართულებით : ბიზნესი და მართვა, სამართალი, ჰუმანიტარული მეცნიერებანი და სოციალური მეცნიერებანი.

ფუნქციონირებდა გურამ თავართქილაძის სახელობის ბიბლიოთეკა, რომელიც შეიქმნა 1992 წელს და სტუდენტების განკარგულებაში გახლდათ უმაღლესი სასწავლებლის დაარსების დღიდან. მისი წიგნადი ფონდი თბილისის ვაჭრობის ტექნიკუმის ფონდის ბაზაზე ჩამოყალიბდა.  ბიბლიოთეკა წლების განმავლობაში  მდიდრდებოდა. შეიცავდა ქართულ, რუსულ, ინგლისურ და გერმანულენოვან ლიტერატურას.

სულ ორი რექტორის გამოცვლა მოასწრო უნივერსიტეტმა. პირველი გურამ თავართქილაძე გახლდათ.  სწორედ მისი შექმნილი იყო  თეუსუ და თითოეულ სტუდენტს შვილივით ეპყრობოდა. 2006 წლამდე გახლდათ უნივერსიტეტის რექტორი, თუმცა არც მას მერე მიუტოვებია თავისი სტუდენტები და ყოველთვის ყურადღებას აქცევდა მათ განათლებას. გარდაიცვალა 2009 წლის 8 სექტემბერს.

2006 წლის დეკემბერში უნივერსიტეტის მეორე რექტორად არჩეულ იქნა ავთანდილ ჩუთლაშვილი, რომელიც უნივერსიტეტს უკანასკნელ ამოსუნთქვამდე სათავეში ედგა. სწორედ მისი რექტორობის დროს მოხდა თეუსუს რეორგანიზაცია, რის შედეგადაც უნივერსიტეტი შეუერთდა თბილისის ივანე ჯავახიშვილის სახელობის სახელმწიფო უნივერსიტეტს.

გურამ თავართქილაძის გარდაცვალებიდან ზუსტად ერთ წელიწადში თეუსუ-სგან მხოლოდ სახელი და ეს დარჩა …

რეორგანიზაციას მოჰყვა დიდი პროტესტი სტუდენტების მხრიდან. იყო დაბნეულობა, გულის ტკივილი, სინანული, გულისწყვეტა… თუმცა არც პროტესტმა გაამართლა და არც გულის აჩუყებამ, თეუსუ უკვე თსუ-ა და აღარაფერი ეშველება.  

საკმაოდ რთული იქნება ჯავახიშვილის რეჟიმთან შეგუება, მითუმეტეს მათთვის ვინც დამამთავრებბელ კურსზეა, ან თუნდაც მაგისტრატურაზე, მაშინ როცა ბაკალავრის დიპლომიც აქ აიღო… თეუსუს მზა ცხრილებით განებივრებულმა სტუდენტმა ცხრა თვალი და ყური უნდა გამოიბას, კედები ჩაიცვას და სდიოს ლექტორებს, საათები შეათანხმოს, საგნები აირჩიოს თან ისე რომ არავინ დაასწროს, ამ ქვეყანაში ხომ ყველაფერი დასწრებაზეა, რა იცი იქნებ სასურველ ლექტორთან სიზარმაცის და სიზანტის გამო ჩაწერა ვერ მოასწროს? კრედიტები ითვალოს რომ მომავალში სემესტრის დამატება არ დასჭირდეს… არა და ეს თეუსუში სულ არ იყო საჭირო და ალბათ გავზარმაცდით კიდეც…  ამას გარდა კიდევ ბევრი საკითხია რომელიც შესაძლოა განხილვის საგანი გახდეს, თუნდაც სამაგისტრო ნამუშევარი, რომელზე მუშაობაც თეუსუში მეორე სემესტრიდან უნდა დაგვეწყო, თსუ-ში კი მოგვიწევს მეოთხე სემესტრში სწრაფ ტემპში მოქმედება… ამას დამატებული იურიდიული კლინიკაც, რომელიც ერთადერთ ნათელ წერტილად მევლინება მთელს ამ აურზაურში.

ამ ორი დღის წინ თეუსუში ვიყავი გასული, ეზო დაცარიელებული დამხვდა, დერეფნები მშვიდი, “არსაიდან ხმა არსით ძახილი”… მხოლოდ დეკანატში ბჟუტავდა სინათლე… მგონი სიბერე შემომეპარა და ძალიან გულჩვილი გავხდი… გული დამწყდა, ბევრ კარგ მოგონებას ინახავს ეს კედლები, აქ ავიდგით ფეხი და დასანანია ასე უკვალდ რომ ქრება …  მისგან მხოლოდ აჩრდილიღა დარჩება …